Os traballadores de Marinships rexeitan na rúa o despedimento dos catro empregados que non estaban afectados polo ERE

Hoxe pola mañá concentráronse nas instalacións de Factoría Naval de Marín e pola tarde desprazáronse á nave do estaleiro Armón de Vigo

Os traballadores de Marinships volveron saír á rúa para denunciar que o xulgado do Mercantil vén de comunicarlles por carta que a empresa presentou un expediente de fin de relación laboral que afecta aos catro últimos empregados. Dende a CIG-Metal de Pontevedra critican que nin a dirección nin o administrador concursal se puxo en contacto cos representantes sindicais e lembran que teñen un prazo de 15 días para negociar os despedimentos. Hoxe comezaron as concentración diante das instalacións de Factoría Naval de Marín e o estaleiro Armón de Vigo que se prolongarán durante toda a semana.

As comunicacións de rescisión de contrato chegaron do xulgado o pasado venres día 6 de agosto, abríndose agora un prazo de 15 días para a negociación do expediente. O secretario comarcal da CIG-Metal de Pontevedra, Marcos Conde, explica que intentaron sen éxito poñerse en contacto cos responsábeis da empresa, polo que optaron por presentar un escrito no xulgado informando dos feitos.

Diante disto, o comité de empresa optou por convocar unha serie de mobilizacións como as levadas a cabo con anterioridade cando a compañía de compoñentes eléctricos para náutica presentou un ERE que afectaba a 10 dos seus 14 traballadores (na empresa permanece só unha administrativa). O calendario de protestas contempla concentracións en Factoría Naval de Marín en horario de mañá (de 8.30 a 12.00) e do estaleiro Armón de Vigo pola tarde (de 12.00 a 19.00).