A
Concellería de Emprego abre outros canles de información sobre posibles ofertas
de emprego
Ponteareas, 12 de xuño de 2012
O alcalde de Ponteareas, Salvador González
Solla e a concelleira de Emprego, Marisol Valado, mantiveron unha reunión con
representantes da empresa ADECCO co fin de que dita empresa faga chegar, ao
Centro de Desenvolvemento Local, todas as ofertas de traballo nas que poidan
participar os desempregados do municipio.
En virtude do convenio acadado, o Concello
limitarase, única e exclusivamente, a dar publicidade ditas ofertas. Tal
e como explicaba a concelleira Marisol Valado, “en ningún caso o Concello
fará ningún tipo de intermediación, nin porá en contacto aos demandantes de
emprego nin con esta nin con ningunha outra empresa de emprego temporal coa que
poidan subscribir acordos similares”.
O Concello porá a disposición da empresa,
sempre en función da dispoñibilidade, os locais para o desenvolvemento das
entrevistas de traballo “sempre en relación coas ofertas de emprego para a
xente do noso concello” explicou Valado Pérez.
Marisol Valado explicou que o acordo
acadado, “que ten única e exclusivamente carácter informativo”, permitirá
que os desempregados e desempregadas do municipio ponteareán, “poidan ter
información sobre ofertas de traballo que poden ser do seu interese”.
A titular de Comercio sinalou que nestes
tempos de dura crise que estamos a vivir, “a Concellería de Emprego ten case
que obriga de achegar a veciños e veciñas toda a información sobre as posibles
ofertas de traballo que, nese momento, existen no mercado”.
|
|
